اصحابى دايماً يقولولى
هو انت بقى مش ليك نية ؟
بعد الخطوبه تفاجأنا !
وتكتب قصيدة رومانسيه
انا قعدت دلوقتى
وكل افكارى برتب
ومسكت قلمى وكام ورقه
وقلمى مش عايز يكتب !!!
كل أما اجرب اكتب حب
الاقى قلمى يكتب شعب
البيه بيكتب بمزاجه
وده برضه وقته الكلمه دى؟
فى قصيدة تانيه ابقى احتاجه
أنا عايز اشكر اخلاقها
واقول عليها كلام حواديت
مش وقتى بلدى بقلقها
سيبلى القصيدة يا ابن التيت
ولسه هكتب عنها كمان
لقيته كتب ان الميدان
بيصرخ على ثورة بتموت
وعلى ترشيح عمر سليمان
ازاى انا هكتب فى رومانسى !
وكل يومين نشوف اخبار
ان الشعب هيفضل منسى
وهيفضل على خط النار
كان نفسى تبقي رومانسيه
يا قصيدة واقدمكى هديه
لكن يمكن اكتب تانى
حتى من باب التسليه
سامحونى يا اصحابى على كتابتى
معرفش دى ميزتى او خيبتى ؟
او عبطى او يمكن طيبتى !
واخيراً سامحينى يا خطيبتى
ماكانتش دى هى النيه
تبقى يا قصيدة سياسيه
كنتى فى خطتى فعلاً تبقى
أول قصيدة رومانــــــســـــــيــــــه
