السياسة
السياسة عند ناس
إن خد يكون مداس
ولما تاخد كل غرضك
يبقى ترجع للأساس
ودى حكاية ثورة كانت
لناس فاض بيها وثارت
ولما حسوا بالآمان
لقيوا بخ الثورة طارت
أصلها لعبة سياسة
واللى عارفين يبقوا ساسة
واللى مايكوه عنده خبرة
يلقى فاسه فى وسط راسه
يحكى أن الثورة قالت
إن ظلمات دوله بانت
وإننا راح نبقى نورها
وراح نكون بدر بدورها
كل ده والباشا ساكت
كان يقينه ان الحكاية
راح تكون له فى النهاية
وقف أوام على الحياد
وقال انا ليكم حماية
بعد ما جابوا المنتخب
كترت أحداث الشغب
كل ما نقول يلا نبنى
نلقى الوضع التهب
وعشان تكون ثورة تمام
مش مظاهرة والسلام
كان لازم له شحن عالى
وطبعا ده دور الإعلام
وآخرة المتمة قال
إن دول حبة عيال
كانوا عايزين يحرمونا
من ثروة ملك الأجيال
ورجعنا تانى لمسرحية
متعادة وكمان هزلية
ان كل اللى يعارضوا
فى قناته او على أرضه
ماسونية ويهودية ولا صهيوأمريكية
والأكادة والأساس تبقى أصلاً إخوانية
قبل ما تهلل شوية
وتقول انه كلام صحيح
قارن سجنك والحرية
وقول ان ده كله زيف
بعدها قول إنى حاقد
على جيش بلدى اللى فاقد
كل حقة عشان بيحمى
لا وكمان فى الحكم زاهد
وقول كمان ان القيادة
دول الإدارة والريادة
والقداسة تبقى ليهم
أعلى من دور العبادة
كل ما أفتكر اليومين
لما كنا فرحانين
بثورة كانت فى كل بيت
من اللى داق ظلم السنين
أبقى نفسى أعلى صوتى
وأقول دى ثورة حتى موتى
بس أوام أرجع لعقلى
واقول يا ليله عدى فوتى
كلنا بندوق فى كاسه
اللى داير من أساسه
وإحنا مش واخدين فى بالنا
أصلها لعبة
سياسة
