المجلس والثعبان

دى مش ذم ولا مديح
ولا منى هيطلع تصريح

انا هحكى يا مصر حكايتك
وارسم رسمة للتوضيح
.......
دى حكاية وكان يا مكان
ست عجوزة ومن زمان
قاعدة فى بيتها ومش ملكاة
وراكب فوق راسها تعبان
.........
وفى يوم صحيت خلعت سنه
لما شافته بيرَكِب ابنه
قالت ده ما يحصل وازاى
هحمل انا اثمى مع اثمه؟
.........
كان التعبان ماسك ايدها
و شمالها خسرت تأييدها
كانت بتقطع فى الجسم
وكأنها ايده مش ايدها 
..........
بعتت ليمينها امسكى رأسه
مسكتها وكتمت انفاسه
وقالتلها يلا اخلصى واقطعى
قطع رقبته هو قصاصه
..........
لكن ايدها رفضت تقطع
استنت دكتورها هيسمع
وبعده يتم الكشف عليها
تقريره بعدها راح يطلع
..........
مش يمكن تعباننا برئ 
وتصرفنا ده يبقى جرئ
انا هفتح ايدى كمان عنه
هفرج عنه شوية ضيق
..........
لا يا إيدينى
ده طلع عينى
وقتل فيا حلم برئ
............
اوعى تسيبى عنه شويه
راح يقتلنى وماليش دية
من غير حتى ما يجرح إيده
وهيدفنى فى الزراعيه 
.............
الدكتور عمال بيأجل
ادفعى بقى كشفك مستعجل
ردت ايدى : وانا ليه ادفع
ما براحته حتى لو طول
............
سيبيه واهدى بلا هدة حيل
الكشف هيطلع بليل
ولو كان فعلا هو الجانى
ليكى جلدُه وكمان الديل
..............
بيتك محتاجهم بزيادة
وعليكى ديون فوق العادة
اوعى تقولى خلاص مش عايزة
بيتك راح يتباع للسادة
..............
روحت انا للدكتور ع الباب 
قولتله يلا اكشف ع الناب
قاللى انا اصلا مش فاضى
ماسك صندوق الانتخاب
.............
من سنة تقريبا دى حكايتك
وآخرها بيشدوا عبايتك
لكن مهما يقولوا ويعيدوا
لسه يا مصر بتعلى رايتك
AhmedSaleh89

المتسول

ماشى فى حالى وبدندن
مش فاكر انا اغنية ايه 
واحد بلهفه وقفنى 
بيقولى عايز حسنة يا بيه 
......
ادينى بس عشان افطر 
واجيب لأمى العلاج
انا خفت منه ليكتر
يوصل معايا لحالة هياج
......
اديته انا واحد جنيه
ايوة بحاله اسم الله عليه
بص وقاللى اعمل بيه ايه
دى اقل دعوة بخمسه جنيه 
......
قولتله معرفش التسعيرة
انا اخرى بشوف حق الجيرة
الراجل عمال يستصعب
شكله كأنه شارب بيره 
.......
قولت اسيبه واشوف مشاويرى
لو حتى جنيه اهو كتر خيرى
ولو مش نافع معاه الجنيه
اكيد هيكمل من حد غيرى
........
اخر اليوم عديت ع الحته
لقيته قاعد مع راجل جته
بيعدوا فلوس يا ما شاء الله
الف ده ايه ؟ يا اخى قول سته 
........
قولت يا خسارة الجنيه
خد باله وقال بتبص على ايه
قولتله لا مفيش ,وبضحكه خبيثه 
أنا بس عايز حسنة يا بيه :)


AhmedSaleh89

ماعندناش

قام الشاب يصيح ويثور 
ع الطغيان لجل ما يغور
والقناص نشن فى الجول
ورئيسه قاللك ماعندنااااش
....
بلطجيه فى كل حته
مفتول عضلات وضخم جته 
احرق دمر اقطع سكه 
طبعا ردوا ماشوفناااااااش
....
قالوا ان ده غلط الثوار
ازاى تشتم فى الكبار
ده الجيش هو اللى حمى الدار
سيبنا نكمل ماترجعناش
....
اسمع يا عسكر مستهبل
الشعب ده دايما متبهدل
ولا هيأثر مهما تندل
لو ناوى تركب مايلزمناااااش
....
ارحل من غير ما تقول كلمة 
حكمك لبلدنا بقى نقمه
مجلس يسحل يقتل بسمه
ينصر اعدائنا ببلاااااااااش
....
ورئيس وزراء مالوش قرارات 
كلة بطعم الصلاحيات
دى حكومه ولا إشتغالات 
يوة بلا خنقة ماتقرفوناش 
....
راح يفضل حبك يا كنانه 
فى القلب مش فى الفم لبانه
وان كان فيكى حكومه سهتانه
لومى عليهم ماتلوميناش 

AhmedSaleh89

اعملى لايك من فضلك

بقت حاجه تقرف
كل استاتيوس
كل حاجه تتكتب
كل حد يقول حاجه فى اى جروب
لازم يكتب فى الاخر


اعمل لايك
لو عجبك اسلخ لايك
بالله عليك اعمل لايك
ورحمة ابوك اعمل لايك
لايك لله يا محسنين
ده اسمه تسول لايكات


اللى متفق معايا يعمل لايك
ههههههههههههههههههههههه
حاجه تشل