بنت جميله وفى غربتها
وبتغمزلى بإبتسامتها
واضحك وأعلّى الضحكايه
..
بالتفكير فى حل مثالى
أوقات ببقى ساعات مرهون
وفجأة يطلع فيا جنانى
بلاقينى أعقل مجنون
..
وفى عز الصيف أنا بتغطى
وأكل كشرى مليان شطه
ولما الشتا بتدق أبوابنا
بالميه الساقعه بتوضا
..
وأزعل من نفسى وعشانى
وهدوئى بيهز كيانى
ولما أتعصب يوم وأتنرفز
بلاقينى بقيت واحد تانى
..
أوقات تانيه ببقى رومانسى
وأجى اكتب عن حبى المنسى
أخد قلبى واقوله سلاااااام
وأدفعله أجرة التاكسى
..
أوقات ببقى الدنيا بحالها
يومها بنهارها وبليلها
وأمسك شمسها ويا قمرها
وأطير وأتغزل فى جمالها
وأقول عنها كلام معسول
وأنا شايف أكتر من غول
لو طالنى راح تبقى نهايتى
و فى تربتى راح أنام بالطول
..
و ف مللى ببقى مشغول
ومع معرفتى بكون مذهول
وأوقات بسأل نفسى كتير
أنا عايش ولا مقتول
..
وبعيش أحزانى مع عيدى
ووقت ما بضعف ببقى حديدى
يعنى بكل بساطتى معقد
أيوه أقصدها : ببقى نقيضى
